Четириесет и шестгодишен маж од гостиварско село, кој работи во Швајцарија, пријавил во полиција дека неговите лични податоци биле злоупотребени, откако дознал дека против него се води извршна постапка за долг од над 82.000 евра, иако, како што тврди, никогаш не подигнал кредит.
Од Секторот за внатрешни работи Тетово информираат дека случајот бил пријавен вчера во 12:30 часот во ОВР Гостивар. Според пријавата, мажот бил контактиран од извршител, кој го известил дека против него се води постапка како сопственик на фирма, поради долг од 5.085.079 денари кон банка во стечај.
Дополнително, во постапката биле побарани и заложени средства – товарно возило „ман“ и работна машина багер, за кои пријавителот тврди дека никогаш не биле во негова сопственост.
Тој појаснил дека никогаш не основал фирма ниту поседувал градежна механизација и се сомнева дека неговите лични податоци биле злоупотребени преку фалсификувана документација при подигнување на кредит.
Од полицијата велат дека се преземаат мерки за целосно расчистување и документирање на случајот, по што ќе следуваат соодветни поднесоци.
