Бенфика на домашен терен го совлада Клуб Бриж со 5:1 и го потврди пласманот во четвртфиналето на Лигата на шампионите. Португалскиот тим имаше предност од 0:2 и по првиот натпревар во Белгија.
Тренерот Роџер Шмит не ја крие среќата по најновиот успех.
„Многу сме среќни. Од почетокот игравме без размислување дека треба да го браниме резултатот од првиот натпревар. Покажавме дека сакаме да одиме напред и да постигнуваме голови. Веќе сме меѓу осумте најдобри екипи во ова натпреварување, така што тоа е големо достигнување за клубот и за играчите. Гонзало Рамош се врати во врвна форма, а традиционално постигнува многу голови. Во моментов тој покажува дека е модерен напаѓач, со сите потребни квалитети“, изјави Шмит по триумфот.
Бенфика го започна своето учество во Лигата на шампионите од прелиминарните кола во квалификациите, а сега се пласираше меѓу најдобрите осум екипи.
