Северна Кореја го воведе рускиот јазик како задолжителен предмет од четврто одделение во основно училиште.
Рускиот министер за заштита на животната средина и еден од копретседавачите на меѓувладината комисија на Русија и Северна Кореја, Александар Козлов, рече дека рускиот е еден од трите најпопуларни странски јазици во Северна Кореја, пишува Политико.
Тој додаде дека во Русија 3.000 ученици и 300 студенти го учат корејскиот јазик. Козлов, исто така, изјави дека минатата година 96 граѓани на Северна Кореја биле примени на руски универзитети, како и дека Русија гради центар во Северна Кореја кој ќе служи за учење на рускиот јазик.
Традиционално силните, руски врски со Северна Кореја дополнително се зајакнати од инвазијата на Украина во 2022 година. Северна Кореја ја снабдува Русија со оружје и испраќа трупи да се борат на фронтот и да ја деминираат Курската област, руска територија која Украина накратко ја окупираше. Исто така, забележано е дека две од најпродуктивните кибер-криминални групи поврзани со држави, руската Гамаредон и севернокорејската Лазарус, разменуваат ресурси.
Во август 2025 година, руски туристи масовно се упатија кон севернокорејските одморалишта откако руските авиокомпании воспоставија директни летови за Пјонгјанг, додава порталот.
