Денеска во Кочани се одржа 21. „Марш за ангелите“, посветен на жртвите од трагедијата во дискотеката „Пулс“. Протестниот марш започна во 17 часот и 5 минути од Паркот на револуцијата – време што симболично ја претставува задоцнетата институционална реакција на настанот.
На собирот, жителка на Кочани чиј брат загина на кобниот 16 март, упати јавни прашања до судиите и јавните обвинители. Таа потсети дека обвинителниот акт е донесен на 13 јуни 2025 година, но сè уште не е оценет.
„Имаме информација дека оваа фаза може да трае и повеќе месеци, но одолговлекување без оправдана причина е спротивно на законот и претставува основ за реакција од наша страна – оштетените или јавноста. Оценка на обвинителен акт нема строг рок, но должност е да одлучите во разумен рок, а поминаа скоро три месеци. Единствено се чека од вас. Ве молиме да ни оставите информации: до каде е постапката за оценка, дали постои рок според кој Советот е должен да донесе одлука, и ако не, кога приближно може да се очекува завршување на оваа постапка,“ изјави Розета Џамова, сестра на еден од настраданите.
Со маршот, семејствата и граѓаните уште еднаш потсетија дека правдата за жртвите од „Пулс“ не смее да се одложува и бараат институциите да ја завршат постапката без дополнително одолговлекување.
