Министерството за дигитална трансформација, предводено од министерот Стефан Андоновски, повторно се најде во центарот на сериозни сомнежи за судир на интереси и непотизам. Само неколку недели откако Државната комисија за спречување на корупцијата (ДКСК) отвори предмет по првиот скандал со тендери, СДСМ објави нови информации кои упатуваат на уште една спорна набавка.
На денешната прес конфернеција СДСМ покажа дикументи со кои трвди дека министерството му доделило тендер во вредност од 600.000 денари на правното лице „БОКИ СИМПЛ ТЕК СОЛУШНС“ ДОО Скопје – фирма која, според свиркачите кои ја доставиле документацијата, е во сопственост на родителите на Борче Младеновски, вработен во ИТ-секторот на истото министерство.
За СДСМ посебно алармантен е податокот дека во документацијата доставена до министерството, контакт-меилот на компанијата е borce002@gmail.com, што дополнително го поврзува вработениот со фирмата која добила јавна набавка. Од СДСМ прашуваат директно – дали министерот Андоновски ќе потврди дека овој тендер завршил кај родителите на негов вработен?
Ова е втор скандал поврзан со министерството на Андоновски во кус временски период. Претходно, СДСМ изнесе докази дека два тендера биле доделени на фирма сопственост на сопругот на државната секретарка во министерството, Гордана Клинчарова. По објавувањето на овие наводи, ДКСК оформи предмет, но и по повеќе од една недела од најавата – јавноста сѐ уште чека одговор и исход од институцијата.
СДСМ предупредува дека селективноста на правдата е неприфатлива, особено кога станува збор за злоупотреба на буџетски средства. Од партијата нагласуваат дека додека целата држава беше во жалост по трагедијата во Кочани, во која загинаа 59 лица, министерот Андоновски не најде за потребно ниту да се воздржи од политички настапи, туку на денот на погребот – 19 март – побарал извинување од СДСМ.
“Ова ја покажува вистинската слика за приоритетите на министерот”, велат од СДСМ, најавувајќи дека ќе продолжат да објавуваат информации и докази кои, како што велат, ќе им помогнат на институциите да ја истераат правдата до крај и нема да се извинат.
Одговор од Министерството за дигитална трансформација сѐ уште нема, а јавноста очекува конкретни дејства – и од ДКСК, и од Јавното обвинителство.
