Сагата околу ѕвездата на Пари Сен Жермен, Килијан Мбапе, изгледа ќе продолжи со полна сила до крајот на летото. 24-годишниот напаѓач ги шокираше клупските шефови со тоа што одби повторно да потпише нов договор и тие му се заканија дека ќе го продадат.
Одговорот на играчот беше дека сака да ги добие сите суми од договорот доколку биде продаден, што не може да се случи. Значи, ситуацијата е во ќорсокак.
Мбапе вчера продолжи со тренинзите со тимот, но неговата иднина допрва ќе се решава. Се очекува тој да има разговор во четири очи со претседателот на клубот, Насер Ал-Хелаифи, во уште еден обид да се постигне разбирање меѓу нив што им одговара на сите инволвирани страни.
Ова ќе биде прв разговор меѓу нив по веста за одлуката на Мбапе да не потпише повторно. Досега двете страни разменија писма и обраќања преку медиумите.
Останува да се види каков ќе биде исходот од овој разговор, но тие треба да најдат решение бидејќи ситуацијата во моментов е лоша за двете страни. Тешко дека ќе биде добро за Мбапе ако Ал-Хелаифи ја следи неговата закана дека ќе го закотви на клупата цела сезона доколку не потпише повторно и одбие трансфер. Но, тоа нема да биде од голема корист ниту за ПСЖ, бидејќи следното лето играчот ќе си замине како слободен агент.
