Американското Министерство за здравство (ХХС), под водство на Роберт Ф. Кенеди, објави предложени регулаторни мерки за спроведување на извршната наредба на претседателот Доналд Трамп, со која се наложува прекин на интервенциите за промена на пол кај деца, за кои се смета дека можат да предизвикаат трајна и неповратна штета. Центрите за Медикеар и Медикаид (ЦМС) предлагаат правило со кое на болниците би им се забранило да извршуваат вакви интервенции кај лица под 18 години, како услов за учество во федералните програми.
Дополнително, се предлага забрана за користење средства од Медикаид и Програмата за здравствено осигурување на деца (ЦХИП) за финансирање на вакви постапки. Според ХХС, интервенциите како блокатори на пубертет, хормонска терапија и хируршки зафати носат ризици од неплодност, нарушен развој и други трајни последици. Кенеди потпиша Декларација со која се оценува дека овие интервенции не ги исполнуваат професионалните стандарди на здравствена грижа.
„Под мое водство и како одговор на повикот на претседателот Трамп, федералната влада ќе направи сѐ што е во нејзина моќ да ги запре небезбедните и неповратни практики што ги изложуваат нашите деца на ризик“, изјави Кенеди. „Нашите деца заслужуваат подобро, и ние го исполнуваме тоа ветување.“
Администраторот на ЦМС, д-р Мехмет Оз, истакна дека „децата заслужуваат заштита, а не експериментални интервенции со животно-променливи ризици и без сигурни докази за корист“. Федералната агенција за лекови (ФДА) испрати предупредувачки писма до 12 компании поради незаконско рекламирање на компресивни градници за деца, наменети за третман на родова дисфорија, најавувајќи дополнителни мерки доколку практиката продолжи. ХХС започна и постапка за поништување на обидот родовата дисфорија да се вклучи во дефиницијата за попреченост, со цел да се разјасни дека ограничувањето на овие интервенции не претставува дискриминација.
Заменик-министерот за здравство Џим О’Нил оцени дека „законот бил злоупотребен за да се наметне поддршка за хируршки интервенции кај малолетници“, додека адмирал Брајан Кристин порача дека „доказите покажуваат дека овие интервенции носат сериозни ризици“.
