Министерството за образование на САД синоќа предупреди дека ќе ја прекине федералната финансиска поддршка за јавните училишта и ќе преземе правни мерки доколку тие продолжат со програмите за различност, еднаквост и инклузија (DEI), кои администрацијата на американскиот претседател Доналд Трамп се обидува да ги укине.
Во писма испратени до високи државни функционери во образованието, Министерството наведе дека училиштата што ќе продолжат со овие програми „може да се соочат со значителни последици, вклучително и тужби од Министерството за правда поради прекршување на договорите“.
Федералните власти им дадоа рок од 10 дена на надлежните во образовниот сектор да потпишат документ со кој ќе потврдат дека нивните училишта „се придржуваат до обврските за спречување на дискриминацијата“.
Од повторното преземање на функцијата на 20 јануари, Трамп презеде повеќе чекори за укинување на DEI-програмите во јавниот и приватниот сектор, вклучувајќи извршни наредби, закани за прекин на федералното финансирање и отпуштања на вработените во владата што работат на овие иницијативи.
Заштитниците на граѓанските права ја критикуваа оваа политика, истакнувајќи дека програмите за различност, еднаквост и инклузија помагаат во поддршката на маргинализираните заедници и во ублажувањето на историските неправди.
Трамп и неговите сојузници, пак, тврдат дека овие програми неправедно ги дискриминираат белците и мажите.
„Федералната финансиска помош е привилегија, а не право“, порачаа од Министерството за образование.
Во февруари, администрацијата на Трамп предупреди дека ќе го намали финансирањето на академските институции што применуваат DEI-програми. Подоцна истиот месец, Министерството за образование отвори онлајн платформа „End DEI“ („Прекратување на DEI“), преку која граѓаните можат да пријавуваат вакви иницијативи во државните училишта.
Администрацијата на Трамп исто така им се закани на универзитетите и колеџите со укинување на федералните средства и поради други политички прашања, како што се политиките за трансродови лица и пропалестинските протести против војната во Газа.
