Руското Министерство за надворешни работи им препорача на граѓаните да избегнуваат непотребни патувања во Германија, наведувајќи го растечкото сомневање и непријателство со кое се соочуваат Русите таму, објавува „Киев пост“.
Портпаролката на министерството, Марија Захарова, изјави дека Русите треба внимателно да проценат дали патувањето во Германија е неопходно и да се придржуваат до официјалните упатства.
Таа изјави дека германските власти се однесуваат со сомнеж кон речиси секој Русин на германска територија, без оглед на тоа дали живеат таму трајно или привремено. Според неа, околу руските граѓани во Германија е создадена атмосфера на недоверба и произволен третман.
Патувањето на руските граѓани во многу земји од Европската Унија стана поограничено по почетокот на целосната руска инвазија на Украина во 2022 година. Неколку земји-членки на ЕУ ги суспендираа или заострија визите за Русите, додека земји како Финска и балтичките држави, исто така, воведоа ограничувања за влез на нивните надворешни граници, наведувајќи безбедносни причини и политички притисок поврзан со војната.
И покрај овие мерки, Германија остана една од главните дестинации во Европската Унија за Русите со важечки визи, дозволи за престој, семејни врски или оние што доаѓаат од хуманитарни причини.
