Државниот секретар на САД, Марко Рубио, денеска телефонски разговарал со турскиот министер за надворешни работи, Хакан Фидан, при што остро ги осудил како „неприфатливи“ нападите врз суверената територија на Турција, откако иранска ракета навлезе во турскиот воздушен простор и беше соборена од страна на НАТО.
Во разговорот, Рубио ја потврдил „целосната поддршка од Соединетите Американски Држави“ за Турција како сојузник во НАТО, соопшти портпаролот на американскиот Стејт департмент, Томи Пигот.
Инцидентот се случи откако ракета, за која се смета дека била истрелана во рамки на пошироките воени дејствија во регионот, навлегла во турскиот воздушен простор. Според турски функционер, проектилот не бил директно насочен кон Турција, туку се оддалечил од својата првична траекторија. Неговата цел, како што се наведува, била воена база на Кипар.
Случајот предизвика силни реакции во Анкара, која го повика на разговор иранскиот амбасадор. Од друга страна, НАТО остро го осуди нарушувањето на воздушниот простор на една од своите членки, нагласувајќи дека безбедноста на сојузниците останува врвен приоритет.
