Шпанските репрезентативци освојувањето на титулата на ЕП ја прославија синоќа на Плаца де Сибелес во Мадрид пред десетици илјади навивачи.
„Водител“ на програмата, која ја обележаа неколку контраверзи моменти беше капитенот Алваро Мората. Новиот напаѓач на Милан во еден момент запеа „Гобралатр е шпански“.
Навивачите ја прифатија пораката, а во ист тон продолжи и Родриго Ернандез, во фудбалскиот свет познат како Родри, кој беше прогласен за најдобар играч на ЕП.
Гибралтар е британска територија со 33.000 жители на југот на Шпанија, за кој Лондон и Мадрид имаат децениски спор.
„Гибралтар е шпански, Гибралтар е шпански…“, пееше 28-годишниот Родри, како што може да се види на снимката објавена на порталот на весникот „Марка“, која ја пренесуваат и други шпански медиуми.
Шпанската државна телевизија (RTVE) на својата веб-страница објави дека за време на прославата неколку играчи пееле за шпански Гибралтар „во неколку наврати“.
Некои англиски медиуми тој момент го опишаа како „невкусен“. Во еден момент од прославата Алваро Мората го потсети Родри дека игра во Англија, на што Родри одговори: „Не ми е гајле“.
Родри е играч на Сити од 2019 година и е под договор до 2027 година. Тој одигра повеќе од 250 натпревари за клубот и со него ја освои титулата во Лигата на шампионите и четири пати ја освои Премиер лигата.
