Собранието денеска на продолжение на 76-та седница треба да гласа за Предлог законот за ратификација на Договорот помеѓу Владата на Република Северна Македонија и Владата на Република Бугарија во врска со подготовката, изградбата и оперативноста на меѓуграничниот железнички тунел.
Договорот беше потпишна во Ѓуешево на 6 ноември од страна на вицепремиерот и министер за транспорт Александар Николоски и неговиот бугарски колега Гроздан Караџов. Со него се уредуваат техничките, финасиските, правните и организациските прашања поврзани со подготовката, изградбата и оперативноста на меѓуграничниот железнички тунел во насока Софија-Ѓуешево – Крива Паланка-Скопје. Проектираната должина на тунелот е околу 2,4 километри од кои 1,2 километри на територијата на државава.
На дневен ред на седницата се и Предлог на закон за изменување на Законот за буџети и Предлог на закон за изменување и дополнување на Законот за експропријација, по скратена постапка. Исто така и предлог законите за гаранција на Република Северна Македонија на обврските по Договорот за заем за финансирање на Проектот на ЕСМ за Фотонапонска електроцентрала Битола 3, меѓу Европската банка за обнова и развој и АД за производство на електрична енергија Електрани на Северна Македонија, во државна сопственост, Скопје, како и на обврските по Договорот за заем за финансирање на Проектот за Фотонапонска електроцентрала Битола 3 и за дополнително финансирање на Проектот за ревитализација на хидроелектрани, кој ќе се склучи меѓу Кредитната банка за обнова – КфВ и АД за производство на електрична енергија Електрани на Северна Македонија, во државна сопственост, Скопје, по скратена постапка.
На дневен ред на седницата е и Резолуцијата за осуда на манипулациите на опозицијата и за потврда на политиките против нелегалната миграција. Исто така и предлог законите за изменување и дополнување на Законот за државните награди, на Законот за прекршоците, на Законот за извршување на санкциите, на Законот за концесии и јавно приватно партнерство, на Законот за возила, на Законот за безбедност на сообраќајот на патиштата, на Законот за полиција, сите по скратена постапка.
