На покана на министерот за федерални, европски, меѓународни работи и медиуми на покраината Северна Рајна – Вестфалија, Натанаел Лимински, министерот за надворешни работи и надворешна трговија, Тимчо Муцунски, денес и утре ќе оствари работна посета на оваа германска покраина.
Во рамки на посетата, министерот Муцунски ќе се сретне со својот домаќин, министерот Лимински, а на средбата ќе присуствува и државниот секретар во министерството, Марк Шпајх. Разговорите ќе бидат насочени кон унапредување на политичката и економската соработка, како и кон поддршката за европската перспектива на државата.
Министерот ќе се сретне и со претставници на македонската дијаспора, а ќе ја посети и црквата „Св. Петка” во Диселдорф, како дел од посветеноста кон нашата заедница во Германија.
Целта на посетата е интензивирање на севкупните односи со покраината Северна Рајна – Вестфалија, продолжување на билатералната соработка во рамки на Заедничката декларација за намери потпишана во 2021 година, како и реафирмирање на поддршката од оваа германска покраина за нашиот пат кон Европската Унија.
