Првото руско тактичко нуклеарно оружје пристигна во Белорусија, изјави синоќа рускиот претседател Владимир Путин на Меѓународниот економски форум во Санкт Петербург. Претходно руската државна агенција ТАСС објави дека главното истражно тело на земјата отворило канцеларија во Белорусија во врска со испораката на тактичко нуклеарно оружје.
Белорусија, која се наоѓа западно од Русија и северно од Украина, е еден од најблиските сојузници на Москва. Тоа ѝ помогна на Русија да ја започне својата првична инвазија на Украина во февруари 2022 година, дозволувајќи им на руските трупи да влезат во земјата од север. Руската употреба на нуклеарно оружје е „теоретски можна доколку постои закана за постоењето на Руската Федерација“, изјави Путин.
Одговарајќи на наводниот трансфер на руско тактичко нуклеарно оружје, Белата куќа завчера соопшти дека нема индикации дека Москва се подготвува да употреби нуклеарно оружје. Американските власти, исто така, не забележале движење на нуклеарно оружје во Русија што би укажало дека тие се движат кон Белорусија.
„Не видовме причина да ја прилагодиме нашата нуклеарна положба, ниту пак индикации дека Русија се подготвува да употреби нуклеарно оружје“, изјави во средата советникот за национална безбедност на Белата куќа.
