Рускиот претседател Владимир Путин денеска на економскиот форум во Св. Петербург одржа едноминутно молчење во чест на поранешниот италијански премиер Силвио Берлускони, кој почина во понеделникот на 86-годишна возраст.
Путин, кој во пораката со сочувство претходно оваа недела рече дека го смета Берлускони за драг пријател и исклучителен политичар, на присутните им рече:
„Тој беше многу добар човек. Неодамна почина поранешниот премиер на Италија, г. Берлускони. Тој направи многу за да изгради нормални долгорочни односи меѓу Русија и земјите од НАТО. Тој беше многу добар човек, многу активен и енергичен“, рече Путин и додаде:
„Без никакво претерување го сметам за личност од светска класа. Се извинувам на публиката. Би сакал да побарам едноминутно молчење во негова чест“.
Исто како и поранешниот германски канцелар Герхард Шредер, Берлускони одржуваше блиски врски со Москва за време на првите години на Путин во Кремљ од 2000 година наваму.
И Берлускони и Шредер станаа лични пријатели на рускиот лидер, додека Западот ги критикуваше дека стојат покрај него долго по илегалната руска анексија на Крим од Украина во 2014 година.
