Рускиот претседател Владимир Путин изјави дека војската ќе продолжи да ја напаѓа енергетската инфраструктура на Украина и покрај бранот глобални критики поради нападите кои оставија милиони луѓе без струја и вода на почетокот на зимата.
„Има многу врева за нашите удари врз енергетската инфраструктура на соседната земја. Да, го правиме тоа. Но кој почна прв?“, рече Путин на церемонија на доделување награди што се одржа денеска во Кремљ. Додае дека критиките нема да ги попречат нивните борбени мисии.
Нападите врз енергетската инфраструктура на Украина, Путин ги опиша како одговор на експлозијата на мостот на Крим и други напади, обвинувајќи го Киев за кревање во воздух на далноводните кабли од нуклеарната централа Курск, но и за прекин на водоснабдувањето во Доњецк.
„Прекинот на водоснабдувањето на град со повеќе од милион жители е чин на геноцид, рече Путин“, обвинувајќи го Западот за „тотален молк“ по ова прашање.
„Штом преземеме акција и направиме нешто како одговор, веднаш се крева врева“, изјави рускиот претседател.
Голем број западни функционери ги нарекоа руските напади врз енергетската инфраструктура на Украина воено злосторство.
