Најмалку две лица загинале, а три се тешко ранети по пукање што се случи за време на младински хокеј натпревар во градот Паутакает, во американската сојузна држава Род Ајленд, соопшти полицијата. Еден од загинатите е и напаѓачот, кој по нападот извршил самоубиство.
Според информациите, напаѓачот најверојатно пукал кон членови на сопственото семејство.
Пукањето се случило на трибините зад една од клупите за играчи, додека натпреварот бил во тек. Снимка од сервисот за пренос на младински спортски настани LiveBarn, објавена од локалната телевизија WJAR, прикажува како играчите бараат засолниште додека се слушаат повеќе истрели. Хокеарите и тренерите панично трчале кон излезите од арената.
Еден присутен граѓанин се обидел да го разоружа напаѓачот. Според сенаторот Jack Reed, токму таа интервенција веројатно спречила уште поголема трагедија. Шефицата на полицијата во Паутакает изјавила дека брзата реакција на граѓанинот помогнала нападот побрзо да биде запрен.
Идентификуван напаѓачот, истрагата продолжува
Полицијата го идентификувала напаѓачот како Роберт К. Дорган, кој се претставувал и како Роберт Еспозито. Тројцата ранети со прострелни повреди се хоспитализирани во критична состојба.
На натпреварот учествувале ученици од повеќе училишта, но сите ученици се безбедни и неповредени, потврдиле училишните власти.
Овој напад се случува само два месеци по пукањето на Универзитетот Браун, што дополнително ја зголеми загриженоста за безбедноста во државата.
Во истрагата, покрај локалната полиција, се вклучени и федерални агенти од Бирото за алкохол, тутун, огнено оружје и експлозиви (ATF), како и државната полиција на Род Ајленд. Истрагата за мотивите и околностите на нападот е во тек.
