Психијатарот Зора Митиќ по барање на адвокатите на Анџело Ѓорѓиевски, зборуваше за психолошката состојба на обвинетиот, на судењето за убиството на ракометарот Денис Тот. Таа пред судот посочи дека Анџело бил физички нападнат од оштетениот, поради што се исплашил. Вака, таа толкува дека дошло до смртоносните удари кои Анџело ги задал на сега починатиот Денис Тот. Дополнително, Митиќ посочи дека Анџело имал лузни на десната рака, истата со која му го задава првиот удар на Тот. Според неа, мускулатурата на овој екстремитет му е слаб, што би значело и дека ударот бил слаб.
„ Анџело е личност која не боледува од трајна или привремена душевна болест, настроеност, развој. Во хронологија на делото, Анџело, бил физички нападнат од страна на оштетениот, бил вербално омаловажуван и понижен, што кај Анџело предизвикало чувство на страв. Оштетениот бил спортист, физички појак, покрупен. Тоа кај Анџело предизвикало чувство на неизвесност, страв, гнев. Овие непријатни емоции довеле до засилен ефект, чувство на надразнетост. Во време на извршување на кривичното дело тој имал покачена афективна состојба, но не до состојба на патолошки ефект, ниту до патолошка надразливост“, кажа Митиќ.
Психијатарот Митиќ, беше испрашан и од судот. Па така, рече дека ако Анџело не бил физички нападнат, тогаш имал психички напад. Од снимките кои беа презентирани до сега, физички напад од Тот кон Анџело – немаше.
„ Во мојот опис имам објаснето и за психичкиот напад кој го трпел Анџело. Ако се докаже дека немало физички напад, за ваквата афективна состојба, имало психички напад“, додаде Митиќ и беше децидна дека немало медицински наоди дека Тот го физички го нападнал Анџело.
На судењето сведочеше и Сања Ефтимовска – специјалист по медицинска психологија. Таа го опишуваше Анџело како лице кое е псивно во стресни ситуации и додаде „Со психолошкото тестирање се виде дека Анџело е склон кон пасивизација, доминираат симптоми на невротски тип. Некој се повлекува, некој напаѓа. Он е од тие типови кои пасивизираат“.
„ Разочаран од себе, намалена самодоверба, песимист во однос на иднината, со присуство на сомато-вегитативни симтоми кои се јавуваат како последица на подолготрајно потиснување и претставуваат физиолошки реакции, кои се емотивните реакции. Емоционално е нестабилен, со чувство на надразнетост. Нема показатели за психијатриско растројство“, додаде Ефтимовска.
Ова е второ психијатриско вештачење, овојпат, нарачано од обвинетите. Претходното, го изработи Александар Марцикиќ. Тој ги опиша сите обвинети како психички здрави особи, со уредна интелигенција. Сите биле загрижени поради настанот, смртниот исход, реперкусиите, кривичната постапка и притворот.
На 7 април, пред ноќен клуб во Градскиот парк во Скопје, обвинетите заеднички го лишиле од живот оштетениот Денис Тот, тврди скопското Обвинителство. По кратка расправија, сите тројца му нанеле повеќе удари и тешки телесни повреди од кои кај оштетениот најпрвин настанала коматозна состојба, а следниот ден починал.
