Полетаа првите патнички авиони од Меѓународниот аеродром „Зајед“ во Абу Даби. Првиот „Ербас А380“ на компанијата „Етихад ервејс“ се упати кон Лондон, означувајќи го почетокот на делумната нормализација на сообраќајот. Полетаа рано попладне по локално време по неколкудневна целосна блокада поради воениот конфликт меѓу САД, Израел и Иран.
Податоците за следење на летовите покажуваат дека веднаш по него биле реализирани летови кон Париз, Москва, Амстердам и неколку дестинации во Азија. Сепак, летањето во овој регион е далеку од нормално. Сите авиони во моментов користат алтернативни рути за да го избегнат Персискиот Залив – летовите кон исток се пренасочуваат преку Саудиска Арабија, додека оние кон запад летаат преку Оман и Оманскиот Залив.
Иако ова е позитивен сигнал, главните центри во Дубаи и Доха сè уште ги чувствуваат последиците од затворањето на воздушниот простор, а стотици илјади патници остануваат заглавени чекајќи го својот ред за евакуација или трансфер.
