Прва официјална лидерска средба помеѓу премиерот Христијан Мицкоски и опозицискиот лидер Венко Филипче станува сè поизвесна, а прашање на договор е дали ќе се одржи на полноќ, по полноќ или на дневна светлина. Филипче најави дека ќе побара средба „очи в очи“ со Мицкоски за да го изложи неговиот „план за ново општество и стратегија за државата во следните 10-20 години“.
Премиерот Мицкоски истакна дека е подготвен да го сослуша Филипче и дека сериозните теми не треба да бидат предмет на јавни спектакли.
“Ако има план, подготвен сум да го примам на средба претседателот на СДСМ да го образложи планот. Ова се сериозни времиња, јас сум сериозен човек, сериозни работи се во прашање и најмалку треба да се прави естрада на јавна сцена. Стојам на располагање во секое време, ќе го прераспределам мојот распоред на полноќ, по полноќ, кога ќе каже – тогаш”, изјави Мицкоски.
Трагедијата во Кочани како пресвртна точка
Лидерската средба доаѓа по трагедијата во Кочани, во која животот го загубија 59 млади во пожар во дискотеката „Пулс“. Филипче оцени дека оваа катастрофа треба да биде поттик за нова форма на политички и општествен дијалог, со цел да се изготви стратегија за иднината на државата.
“Системот очигледно на многу места не функционира. За тоа вина имаат сите политички партии, па затоа е потребна нова форма на дијалог за изготвување стратешки документи. Ова не смее да остане само декларативна заложба, туку мора да доведе до конкретни решенија,” порача Филипче.
Стратегија за повеќе области
Планот на Филипче опфаќа образованието, здравството, правосудството, животната средина и департизацијата на администрацијата. Идејата е по средбата со премиерот, овој план да биде споделен и со лидерите на парламентарните партии.
Дополнително, Филипче ќе предложи македонскиот блок да настапи со заеднички кандидат за градоначалник на Кочани на локалните избори. Сепак, Мицкоски оцени дека е прерано да се зборува за тоа.
Дали ќе има анкетна комисија за трагедијата?
Филипче засега не инсистира на формирање анкетна комисија за трагедијата во Кочани, но смета дека истрагата се води селективно.
“Ќе ја следиме истрагата, но ако забележиме дека има тенденција за селективност, ќе побараме анкетна комисија и сите други механизми кои се на располагање,” рече тој.
Средбата меѓу Мицкоски и Филипче би можела да даде нов правец на политичкиот дијалог во земјата, но останува да се види дали таа ќе резултира со конкретни решенија или ќе остане уште еден политички маневар.
