Истражувачите од Националниот универзитет во Сингапур создадоа иновативен прототип кој може да го отвори патот кон иднина без батерии. Иако безжичното полнење на уредите веќе не е новост, оваа технологија оди чекор подалеку со можноста да се користат уреди без потреба од батерија.
Тимот на научници разви модул кој собира енергија од амбиенталните радиофреквенциски сигнали и ги претвора во DC напон, што може да напојува мали електрични уреди. Оваа нова технологија може значително да ја намали зависноста од батерии, да го продолжи животниот век на уредите и да го намали влијанието врз животната средина.
Сепак, ваквите технологии се соочуваат со предизвици поради ниската моќност на амбиенталните сигнали. За решавање на овие проблеми, истражувачите, во соработка со колеги од Јапонија и Италија, развија нано-исправувач кој може да конвертира сигнали со моќност помала од -20 dBm во DC напон.
Оваа технологија, чиј резултати беа објавени во престижното списание „Nature Electronics“, може да отвори нови можности за развој на самоодржливи паметни системи и безжични технологии на иднината.
