Илјадници демонстранти вчера излегоа на улиците на Минеаполис, а студентите ширум САД организираа прекин на наставата и штрајкови барајќи повлекување на сојузните имиграциски агенти од Минесота по убиството на двајца американски државјани.
Студентите и наставниците ја напуштија наставата од Калифорнија до Њујорк на националниот ден на протести.
Во рамките на борбата против мигрантите, претседателот Доналд Трамп испрати 3.000 припадници на федералните служби во областа на Минеаполис кои патролираат по улиците во тактичка опрема, што се пет пати побројни сили од полициската управа на Минеаполис.
Протестирајќи поради порастот на бројот на луѓе и тактиките кои ги користи американската имиграциска и царинска служба, неколку илјади луѓе се собраа во центарот на Минеаполис на температури под нулата, вклучувајќи семејства со мали деца, постари парови и млади активисти за човекови права. Во близина на местото каде што претходно овој месец федерални агенти на имиграциската служба (ИЦЕ) пукаа и ги убија Алекс Прети и Рене Гуд, двајца американски државјани, околу 50 наставници и вработени во локалните училишта се собраа на марш.
Пејачот Брус Спрингстин даде поддршка на протестот, излегувајќи на бината на настан за собирање средства за семејствата на Гуд и Прети во центарот на Минеаполис. Тој на гитарата имаше залепен натпис „Уапсете го претседателот“ и ја отсвири својата нова песна „Улиците на Минеаполис“, напишана како реакција на настаните во тој град.
Протестите се проширија и надвор од Минесота.
„Нема работа. Нема училиште. Нема купување. Престанете да го финансирате ИЦЕ“, гласеше слоганот на веб-страницата на организаторот, „nationalshutdown.org“, која наведе 250 локации за протести ширум 46 држави и во поголемите градови како што се Њујорк, Лос Анџелес, Чикаго и Вашингтон.
