Претседателот Стево Пендаровски денеска го прими Жарко Димитриоски, претседател на Асоцијацијата на млади претприемачи во Стопанската комора на Северна Македонија, Тим-40.
Димитриоски го запозна претседателот Пендаровски со активностите на нивната асоцијација, како и со нивните иницијативи, предлози и идеи со цел унапредување на претприемништвото во земјава.
Димитриоски пред претседателот ја претстави нивната иницијативата за решавање на јазичниот проблем со Гугл, односно огласувачите од земјава и оние кои таргетираат Македонци, да можат да се рекламираат на Гугл на македонски јазик, посочувајќи дека ограничувањата не се само за Гугл, туку и за Јутјуб и други страници кои објавуваат реклами како дел од партнерската мрежа на Гугл.
Воедно, Димитриоски го запозна претседателот со нивниот предлог одредени државни простории да се пренаменат во деловни простории, коишто за минимален надомест би можеле да ги користат старт-ап фирми, или мали бизниси, како и со иницијативата за издавање на ваучери за обука за користење на вештачката интелигенција на вработените во мали и средни претпријатија.
Димитриоски го запозна претседателот Пендаровски и со нивните идеи кои имаат за цел стимулирање на растот на плати и зголемена потрошувачка во земјата, како и стимулирање на вработувањето на млади коишто немаат искуство.
Претседателот ги поздрави заложбите и иницијативите на Асоцијацијата на млади претприемачи Тим-40, посочувајќи дека за успешна реализација неопходна е поддршката од државните институции и соработка со бизнис секторот.
Во таа насока, претседателот особено ја поздрави и поддржа иницијативата за решавање на проблемот со македонскиот јазик на Гугл.
