Русија започна невидена кампања на мешање за да се наметне врз Молдавија на изборите на 28 септември, осуди претседателката на земјата кандидат за ЕУ, Маја Санду, денес пред Европскиот парламент.
„Денес се соочуваме со неограничена хибридна војна во размер што не е виден од руската инвазија на Украина“, изјави таа пред европратениците во Стразбур. „Целта на Кремљ е јасна: да ја добие Молдавија на изборите, да ја искористи против Украина и да нè претвори во отскочна даска за хибридни напади во Европската Унија“, осуди таа. „Со одбрана на изборите на 28 септември од влијанието на Москва, ние ја заштитуваме не само Молдавија, туку и регионалната безбедност и стабилност“, додаде молдавската претседателка.
Кишињев и Европската Унија редовно ги осудуваат руските кампањи за дезинформации и манипулации во пресрет на овие парламентарни избори. Францускиот претседател Емануел Макрон, германскиот канцелар Фридрих Мерц и полскиот премиер Доналд Туск изразија „решителна поддршка“ за членството на Молдавија во ЕУ кон крајот на август во Кишињев, наспроти „лагите“ и „мешањето“ на Москва пред изборите.
Унгарија е исто така со Русија
Молдавија ги започна преговорите за пристапување во ЕУ минатата година, со силна поддршка од својот претседател, реизбран во ноември 2024 година. Сепак, преговорите, отворени истовремено со Украина, се блокирани од противењето на Унгарија, која е непријателски настроена кон кандидатурата на Киев.
„Нашиот европски пат не е само прашање на вредности, туку е прашање на опстанок, и токму затоа што постигнавме голем напредок на тој пат, Русија го ослободи својот арсенал од хибридни напади против нас“, додаде Санду.
