Предлог законското решение за изменување и дополнување на Законот за пензиското и инвалидското осигурување, предложено од Министерството за социјална политика, демографија и млади, успешно ја помина владината процедура и наскоро ќе биде ставено на дневен ред пред пратениците во Собранието.
Овој Предлог-закон предвидува зголемување на пензиите во два наврати – на 1 септември 2024 година и 1 март 2025 година. Согласно со предложените измени, сите видови пензии остварени до 31 август 2024 година ќе бидат зголемени за 2.500 денари на 1 септември 2024 година. Дополнително, пензиите остварени до 28 февруари 2025 година ќе бидат зголемени за истиот износ на 1 март 2025 година.
Целта на овие измени е да се обезбеди подобрување на животниот стандард на пензионерите, со цел да им се овозможи поквалитетен и посигурен живот. Предлогот за измена на Законот претставува дел од напорите на Владата за подобрување на социјалната заштита и поддршка на пензионерите во услови на економски предизвици.
