Пожарот во фабриката „Макпрогрес“ во Виница е под целосна контрола, неколкумина пожарникари се здобиле со изгореници, соопшти во текот на ноќта директорот на Дирекцијата за заштита и спасување Стојанче Ангелов.
Како што информираше Ангелов, пожарникарите се здобиле со изгореници на стапалата откако се заглавиле во смола од стопен шеќер во еден од погоните на фабриката што бил зафатен од пожарот
Пожарот во фабриката позната по брендот „Винчини“ зафатил три линии означени како 6,7 и 8, од кои два магацини. Сите имале сончеви панели на кровот.
Заради спецификите на пожарот и заради тоа што фабриката е во урбана средина, била неопходно е ангажирање исклучиво на професионални пожарникари и во гаснењето учествувале пожарникари од Територијалните противпожарни единици на Виница, Македонска Каменица, Делчево, Кочани, Пробиштип, Штип, Струмица, Кавадарци и Велес.
Првично од Центарот за управување со кризи (ЦУК) информираа дека пожарот во фабриката за кандирани производи и вафли, позната под брендот „Винчини“, бил пријавен во 18:40 часот преку единствениот број за итни случаи – 112.
Пожарот избувнал во магацините и во производствените погони 6, 7 и 8 на фабриката. На терен веднаш излегле екипите на ТППЕ Виница со неколку противпожарни возила и пожарникари, по што на помош веднаш им дојдоа колеги од кочанската противпожарна единица и од Доброволното протипожарно друштво (ДПД) Кочани, а потоа стигна и дополнителната поддршка и помош од соседните општини.
