Пожар избувна попладнево на планината Скопска Црна Гора, на повисоките делови над селата Арачиново и Страчинци. Според првичните информации, зафатена е сува трева, а огнот се проширил на повеќе локации.
„Денеска во попладневните часови, на Единствениот повикувачки број за итни повици 112 беше пријавен пожар на планината Скопска Црна Гора, при што се евидентирани активни жаришта на повеќе локации“, информираа од Центарот за управување со кризи (ЦУК).
На терен интервенираат екипи од Бригадата за противпожарна заштита на Град Скопје, кои преземаат мерки за локализирање и гаснење на пожарот. Засега нема информации за повредени лица или зафатени објекти.
