Индонезиските власти денеска евакуираа повеќе од 900 луѓе и олеснија безбедно враќање на 170 планинари кои останаа заглавени по ерупцијата на вулканот Семеру на островот Јава, при што е задржано највисокото ниво на тревога.
Откако Семеру вчера еруптираше десет пати, испуштајќи огромни облаци од пепел и исфрлајќи лава и камења 13 километри низ падините, локалните власти соопштија дека опасноста сè уште е висока.
Планинарите преку ноќ останале заробени во камп покрај езеро во подножјето на вулканот, на околу шест километри од кратерот, но сега им се помага да се евакуираат, рече Септи Вардани, службеничка на националниот парк Семеру. „Сите планинари со своите водичи се безбедни“, изјави Вардани и додаде дека „ситуацијата е под контрола“.
Последната голема ерупција беше во декември 2021 година, кога загинаа најмалку 51 лице, а околните села беа покриени со пепел.
Вулканот Семеру, висок 3.676 метри, е еден од околу 130 активни вулкани во Индонезија. Земјата лежи на „Пацифичкиот огнен прстен“, високо сеизмички активна зона каде што се среќаваат тектонски плочи, предизвикувајќи бројни земјотреси и вулкани.
Спасувачката агенција на Источна Јава распореди десетици вработени за да помогнат во евакуацијата, а 956 луѓе кои живеат во близина на вулканот веќе се преместени во училишта, џамии и владини згради, рече официјалниот претставник на агенцијата Прахиста Диан. „Исто така, распоредивме персонал за да провериме дали има уште заробени жители“, додаде тој.
