Штетата предизвикана од денешните руски ракетни напади врз енергетската инфраструктура на Украина може да биде најголемата од сите напади овој месец.
Руските сили во октомври почнаа да ги напаѓаат украинските електрани, трафостаници и други енергетски објекти со беспилотни летала и проектили.
Украинската државна компанија „Укренерго“ ја спореди штетата од денешните ракетни напади со последиците од нападите од 10 до 12 октомври, што го намали капацитетот за производство на електрична енергија на Украина за околу 30 отсто.
„Воведени се ограничувања за снабдување со електрична енергија во Киев и низ регионите Киев, Чернихив, Черкаси, Житомир, Суми, Харков, Полтава, Днепропетровск, Запорожје и Кировохрад“, се вели во соопштението на „Укренерго“.
„Неопходни се ограничувања за да се намали оптоварувањето на мрежата и да се избегнат несреќи откако електричната мрежа беше оштетена во терористички ракетни напади“, се вели во соопштението.
Милион и пол домаќинства останаа без струја
„Укренерго“ наведува дека поправките на мрежата се одвиваат низ целата земја. Во Миколаив, град на југот на земјата, обновено е снабдувањето со електрична енергија, објави градоначалникот Олександр Сенкејевич.
„Светлата полека се вклучуваат во различни делови на градот. Им благодарам на инженерите за посветената работа“, напиша тој на Телеграм.
Претходно денеска, претставник од кабинетот на украинскиот претседател Зеленски изјави дека повеќе од 1,5 милиони домаќинства останале без електрична енергија по руските ракетни напади.
