Основното јавно обвинителство Скопје поднесе обвинителен акт против две лица, кои се товарат дека како соизвршители сториле кривично дело загрозување на животната средина и природата со отпад. Според обвинителството, истрагата покажала дека во текот на октомври годинава обвинетите, со пропуштање на надзор при собирањето, транспортот и управувањето со отпадот, можеле да предизвикаат сериозно оштетување на почвата, воздухот или водата, како и опасност по животот и здравјето на луѓето.
-Вршителот на должноста директор во ЈП „Комунална Хигиена“ Скопје, постапил спротивно на Статутот на претпријатието, на Законот за комунални дејности и не ги спроведувал одлуките и заклучоците на Управниот одбор, не се грижел за спроведување на деловната политика на претпријатието, не ги извршувал работите од неговиот делокруг на работа, не учествувал во утврдување на критериумите за користење и распоредување и за управување со средствата остварени со работењето на претпријатието, не го следел и не го анализирал извршувањето на плановите и договорните обврски и не преземал мерки за нивно остварување и не обезбедил мерки за заштита на животната средина. Како директор на јавно претпријатие кое е давател на комунална услуга бил должен, но сепак давањето на комуналните услуги не го вршел постојано и квалитетно и не се грижел да ги одржува во функционална и исправна состојба објектите, опремата и уредите, се посочува во соопштението.
Заедно со вториот обвинет, управител за отпад, кој поседувал уверение за управување со отпад, како што додаваат од обвинителството, постапувале спротивно на Законот за животна средина и Законот за управување со отпад, не преземајќи мерки за заштита и не спроведувајќи ги плановите за управување со комуналниот отпад во Скопје.
Поради неизвршување на редовното собирање и транспортирање на безопасен отпад и непобарана измена на оперативните планови, обвинетите, според обвинителството, овозможиле создавање диви депонии на јавни и сообраќајни површини.
-Бидејќи прибирањето на доказите е завршено, а обвинетите веќе немаат можност да влијаат на постапката, јавниот обвинител предложи мерката притвор да им биде заменета со мерки на претпазливост – забрана за напуштање на живеалиште, обврска да се јавуваат повремено во судот и привремено одземање на патна исправа или друга исправа за преминување на државна граница, односно забрана за нејзино издавање. За обвинетиот управител со отпад кој се уште е вработен во ЈП „Комунална хигиена“, обвинителството предложи и дополнителна мерка – забрана за преземање на определени работни активности кои се поврзани со кривичното дело, односно привремено отстранување од работното место, стои во соопштението.
