Пензионираниот полицаец, по кој МВР трагаше, бидејќи е еден од осомничените за трагедијата во Кочани, утринава се пријавил во полициска станица. Неговото семејство негираше дека е во бегство, туку тврдеше дека никој не го побарал.
-Осомничениот утринава се пријави и сега е пред судија на претходна постапка, потврдуваат од Обвинителството.
За пожарот кој избувна во дискотеката „Пулс“ во Кочани завчера истрагата беше проширена за уште седумина полицајци.
-Одделот за внатрешна контрола, криминалистички истраги и професионални стандарди при МВР до надлежното Основно јавно обвинителство за гонење на организиран криминал и корупција – Специјализирано одделение за гонење на кривични дела сторени од лица со полициски овластувања и припадници на затворската полиција поднесе кривична пријава за кривично дело „тешки дела против општата сигурност“ по член 292 став 2 од Кривичниот законик во врска со кривично дело „предизвикување општа опасност“ по член 288 став 2 и став 3 од Кривичниот законик, информираа од МВР.
