Притвореник почина вчера во истражниот затвор „Скопје“ во Шуто Оризари, информираа денеска од Министерството за внатрешни работи. Семејството на починатиот тврди дека тој немал соодветна здравствена грижа, иако боледувал од сериозни заболувања, меѓу кои и канцер.
Адвокатот Асмир Алиспахиќ, роднина на починатиот, на социјалната мрежа Фејсбук напиша дека Мирсад Пушка, кој изминатите пет месеци бил во притвор, не добивал терапија соодветна на неговата здравствена состојба.
„Човекот имаше сериозни дијагнози и требаше секојдневно да прима терапија. Во затворите нема ниту основни услови за живот, а најмалку за ваков тип на здравствена грижа,“ изјави Алиспахиќ, апелирајќи институциите, особено Управата за извршување на санкции, да им обрнат поголемо внимание на притворениците со тешки здравствени проблеми за вакви трагедии да не се повторуваат.
Од МВР информираа дека вчера околу 15:30 часот вработен во затворот пријавил дека Пушка побарал лекарска помош. Во 15:58 часот, лекар од Итната медицинска помош констатирал смрт.
Директорот на КПУ „Скопје“, Бобан Утковски, за ТВ Телма изјави дека на притвореникот му се слошило, по што била повикана Брза помош. „Во меѓувреме почнал да губи свест, а не помогнале ниту обидите за реанимација,“ рече тој, додавајќи дека обвинетиот бил редовно спроведуван во болница, но не бил хоспитализиран.
Од Кривичниот суд велат дека имале информации за повеќе дијагнози, но не и за канцер. Според нив, мерката притвор може да се измени по предлог на странките, а таков предлог бил поднесен на 29 август, но постапката сè уште е во тек. „При сослушување, ниту обвинетиот лично, ниту преку бранителот, не информирале дека боледува од рак. Тој редовно беше носен на сите потребни медицински прегледи,“ наведуваат од Судот.
Мирсад Пушка беше еден од 36 обвинети во предметот „Синдром“, што се однесува на злоупотреби и поткуп при издавање инвалидски пензии и туѓа нега. Тој од април годинава се наоѓаше во притвор во затворот во Шуто Оризари.
