Американскиот актер Ерик Дејн, најпознат по улогата на д-р Марк Слоун во популарната серија „Вовед во анатомија“, почина на 53-годишна возраст, помалку од една година по дијагнозата на амиотрофична латерална склероза (АЛС).
„Со тешко срце споделуваме дека Ерик Дејн почина по храбрата битка со АЛС“, соопшти неговото семејство, пренесе 4news.mk.
Дејн остави силен печат во телевизиската индустрија, а публиката најмногу ќе го памети по харизматичната улога на д-р Мекстими, односно Марк Слоун, лик кој го толкуваше во 139 епизоди од серијата во периодот од 2006 до 2021 година. Покрај „Вовед во анатомија“, тој имаше значајни улоги и во сериите „Еуфорија“, „Волшебнички“, каде го играше Џејсон Дин, како и во драмската серија „Последниот брод“, во која се појави како капетан Том Чендлер.
Роден во Сан Франциско во 1972 година, актерската кариера ја започна во 1993 година со телевизиски улоги, по што постепено се проби до холивудската сцена. Настапи и во неколку филмски проекти, меѓу кои „Икс-Мен: Последниот фронт“ (2006) и „Лоши момци 4“ (2024).
Дејн беше во брак со актерката Ребека Гејхарт, со која има две деца. По поставувањето на дијагнозата АЛС, тој активно се вклучи во кампањи за подигање на свеста за болеста, која предизвикува прогресивна парализа на мускулите и претставува најчеста форма на моторна невронска дегенерација.
„Последните месеци од животот ги посвети на ширење на свеста за АЛС, со цел да помогне во разбирањето и поддршката за сите кои се соочуваат со оваа болест“, се наведува во соопштението на неговото семејство.
Со неговото заминување, Холивуд губи актер кој со години беше препознатлив по својот шарм, талент и силно присуство на малите и големите екрани.
