Денеска во Домот на Армијата, министерката за одбрана Славјанка Петровска присуствуваше и се обрати на јавната дебата за новото законско решение за вработените во Министерството за одбрана, кое има за цел да донесе значајни позитивни промени во одбраната и да создаде основа за унапредување на работните процеси, подобра и поефикасна соработка помеѓу цивилниот и воениот персонал, да ја зголеми ефикасноста во одговор на идните безбедносни предизвици и да го унапреди националниот безбедносен систем.
„Ја заокружуваме годината со уште една јавна дебата, која е одраз на посветеноста на Министерството за одбрана кон подобрување на условите за работа на вработените, унапредување на работните процеси и пред сè јакнење на одбраната и безбедноста на државата“, рече министерката и додаде дека текстот на предлог – законското решение произлегува од новите обврски со членството во НАТО.
Министерството се здоби со нови задачи и обврски, потенцираше министерката, за кои е потребна соодветна персонална структура и капацитети.
„Новиот систем на менаџирање со персоналот, кој е составен дел од Предлог Законот, ќе овозможи персоналот во континуитет да гради капацитети за придонес во исполнувањето на трите клучни задачи на Алијансата – одвраќање и одбрана, превенција и менаџирање на кризи и кооперативна безбедност. Треба да градиме персонал кој ќе дава придонес не само во националниот безбедносен систем, туку ќе биде подготвен да работи во структурата на Алијансата, воена и цивилна. Вработените во Министерството за одбрана треба да ги подготвуваме и за учество во операциите и мисиите предводени од НАТО, посебно во операции за стабилизација и реконструкција во пост-конфликтни региони и земји“, рече министерката.
