Папата Франциско денеска ја спореди моментната ситуација во светот со кубанската ракетна криза во 1962 година, а водечките лидери на светските религии ги повикаа политичарите на мир за да се избегне заканата од нуклеарна војна.
Поглаварот на Католичката црква претседаваше со свеченото затворање на тридневната конференција во римскиот Колосеум, организирана од италијанската католичка заедница „Сант’Еџидио“, која се залага за мир во светот.
По одделните молитви на разни религиозни групи, папата Франциско во обраќањето до илјадници луѓе го осуди „мрачното сценарио, во кое, за жал, плановите на моќните светски лидери не ги земаат предвид праведните аспирации на народот“.
„Денес, всушност, отворено се заканува она за што се плашевме и се надевавме дека никогаш повеќе нема да слушнеме: употребата на атомско оружје, кое, по Хирошима и Нагасаки, продолжи погрешно да се произведува и тестира“, рече папата осврнувајќи се на можност за употреба на нуклеарно оружје во Украина.
Папата Франциско потсети како на 25 октомври 1962 година, во екот на кубанската ракетна криза, папата Иван XXIII апелира до тогашните лидери да го спасат светот од уништување.
„Денес, мирот е сериозно нарушен, напаѓан, и тоа во Европа, на самиот континент кој во минатиот век ги претрпе ужасите на двете светски војни“, додаде папата.
