Папата Франциск денеска пристигна во тридневна посета на Казахстан, а утре ќе учествува на Конгресот на лидерите на светските и традиционалните религии.
Авионот со папата Франциско од Рим слета по шестчасовно патување во главниот град на централноазиската република. Поглаварот на Католичката црква денеска ќе се сретне со претседателот Касим-Зомарт Токајев и со дипломати.
За 85-годишниот Папа, кој страда од проблеми со коленото и поголемиот дел од времето го поминува во инвалидска количка, посетата на Казахстан е трето патување во странство годинава, по патувањата во Малта и Канада.
Во главниот град Нур-Султан, кој до 2019 година се викаше Астана, ќе се одржи седмиот Конгрес на лидерите на светските и традиционалните религии.
