Црна Гора мора да биде целосно посветена на напредок на полето на европската интеграција со цел како земја која напредна најдалеку во процесот, што е можно поскоро да ги заврши преговорите и да стане полноправна членка на ЕУ, велат од Центарот за економски и европски студии, пренесуваат тамошните медиуми.
Како што наведуваат во соопштението, регионалната соработка е неопходна и пожелна, но и регулирана во доволна мера со различни иницијативи и договори, пред се со ЦЕФТА договорот, а веќе оптоварените и ограничени административни капацитети треба да се насочат кон забрзување на европската интеграција.
„Во вакви предизвикувачки моменти, изјавите на одредени владини функционери во техничкиот мандат за „Отворен Балкан“ и учество на Црна Гора во таа иницијатива се само одвлекување на вниманието и губење енергија од стратешката цел – интеграција во ЕУ. Очигледно се работи за лични ставови на одредени претставници на Владата, пред се на премиерот, а не за ставот на државата Црна Гора во однос на оваа иницијатива за регионална соработка“, наведуваат во соопштението на Центарот за економски и европски студии, пренесуваат медиумите.
Владата, според нив, три месеци ја нема формирано најавената работна група која би подготвила сеопфатна анализа за предностите и недостатоците на членството во „Отворен Балкан“, не е јасно врз основа на кој официјален документ на Владата или Парламентот на Црна Гора, без кој не може да се води ваков важен процес, премиерот, како што додаваат, продолжува со изјавите дека „Отворен Балкан“ не е алтернатива за ЕУ.
„Дека процесот на преговори за членство на Црна Гора во ЕУ не само што е забавен, туку практично е запрен, потврдува и практиката на Владата, која неколку месеци зборуваше за забрзување на активностите на затворање на преговарачките поглавја за членство во ЕУ, но постапките покажаа дека нејзиниот фокус е всушност на „Отворен Балкан“ и други теми кои всушност ги забавуваат преговорите на Црна Гора за членство во ЕУ“, се заклучува во соопштението на Центарот за економски и европски Студии.
