Иранско-германски државјанин беше осуден на смрт во Иран, што германската министерка за надворешни работи, Аналена Бербок, го опиша како „апсолутно неприфатливо“.
„Смртната казна за иранско-германскиот државјанин Џамшид Шармахд е апсолутно неприфатлива. Имплементацијата на смртната казна против Шармахд ќе доведе до значајна реакција“, рече Бербок.
Германија го повика иранското раководство да ги исправи недостатоците во судскиот процес и да се воздржи од изрекување на смртна казна.
Иранското правосудство го осуди на смрт германско-иранскиот дисидент Џамшид Шармахд за негова наводна вмешаност во напад. Случајот може дополнително да ги заостри односите меѓу Техеран и Европејците.
На Шармахд (67) му се суди во Техеран под обвинение дека учествувал во напад на џамија во Шираз, јужен Иран, во кој во април 2008 година загинаа 14 лица. Шефицата на германската дипломатија, оцени дека тој бил однапред прогласен за виновен за јавните обвинувања и потсети дека од неговото апсење, германските власти интервенирале на високо ниво за да му помогнат.
Шармахд, кој живеел во САД, се верува дека бил киднапиран од ирански агенти во Дубаи во 2020 година, а потоа насилно одведен во Иран преку Оман. Тој ги отфрли сите обвиненија, а група за човекови права објави дека се соочува со грубо нефер судење врз основа на принудени признанија.
