Нема да има повеќе толеранција за сите оние кои го трујат воздухот. Ова е пораката на градоначалникот на Скопје, Орце Ѓорѓиевски на денешната вонредна седница на град Скопје. Во претходните два месеци, инспекциските служби казниле правни и физички лица со високи глоби.
Највисоката изречена казна за еколошки прекршок изнесува вртоглави 53.000 евра, а инспекторите извршиле над 45 вонредни надзори во кругот на поранешните фабрики ОХИС и Стаклара, како и во општина Сарај.
Биланс на инспекциските контроли (6 ноември – 1 јануари):
- 90 прекршочни платни налози и глоби;
- 290 опомени за различни прекршоци;
- Казни за градилишта: 11 објекти казнети со по 1.300 евра за комунални прекршоци;
- Физички лица: Казни од 250 до 500 евра за палење отпад на отворено.
„Овој проблем бара посветеност и заедничка одговорност. Загадувањето не е создадено од сегашниот систем, но наша обврска е да делуваме. Скопје заслужува чист воздух и ред во јавниот простор“, истакна Ѓорѓиевски.
