Европскиот комесар за проширување, Оливер Вархељ, изјави дека Западен Балкан е геостратешки приоритет за Европската Унија повеќе од кога било за време на украинската криза и порача дека е неопходно да се забрза процесот на проширување на овој регион и неговата европска перспектива да се претвори во реалност.
Во видеопорака на конференцијата на граѓанското општество на Западен Балкан, што се одржа во Прага, на тема „Младинската политика на Западен Балкан – суштински елемент за иднината на регионот и Европа“, Вархељ рече дека „ние живееме во прилично турбулентни времиња“ и укажа на предизвиците со кои се соочува ЕУ.
„Покрај социо-економските предизвици предизвикани од кризата поради Ковид-19, со кои сè уште се обидуваме да се справиме, руската војна во Украина постепено го зголемува нивото на уништување, а бројот на загинати во Украина расте експоненцијално. Оваа агресија мора да заврши“, рече Вархељ, а беше објавено на официјалната веб-страница на ЕУ.
