Стен Вавринка можеби го спречи Новак Ѓоковиќ да освои уште два гренд слема со двете победи во големите финалиња во минатото, но во петочната вечерна сесија на Вимблдон, 38-годишниот Швајцарец немаше сили да му се спротистави на светскиот рекет број 2, кој стигна до убедива победа во три сета со 6:3/6:1/7:6(5) за нешто повеќе од два часа.
Вавринка пред мечот изјави дека се надева дека српскиот ривал „нема да го убие“, но апсолутно немаше одговор за играта на Србинот. Во првиот сет беше доволен еден брејк за предност на Ѓоковиќ, за во вториот да ја искористи несигурноста во играта на противникот и да направи три брејка и да го освои за само 31 минута.
Во третиот сет, Вавринка покажа дека не за џабе е трикратен гренд слем шампион, успевајќи да одолее на сите напади и не дозволи брејк, за потоа да потклекне во тај-брејкот.
Ова беше 27. меч помеѓу двајцата добри познаници, и сега Ѓоковиќ има 21-6 скор!
Следен за актуелниот седумкратен шампион ќе биде Полјакот Хуберт Хуркач, откако 17. носител со 7:6(4)/6:4/6:4 беше подобар од Италијанецот Лоренцо Мусети.
