Еврејската заедница во Македонија вечерва соопшти дека во текот на денешниот ден бил извршен обид за подметнување пожар во нивен објект, вклучително и во синагогата во Скопје, инцидент што предизвика силни реакции во јавноста.
Случајот дополнително ја вознемири јавноста откако на социјалните мрежи се појави видео од настанот, кое го сподели и израелската амбасадорка во Скопје, Вивиен Аисен.
Претседателот на Еврејската заедница, Пепо Леви, остро го осуди инцидентот, нагласувајќи дека ваквите дејствија не претставуваат само напад врз верски објект, туку и директен удар врз соживотот, достоинството и меѓусебната почит во македонското општество.
„Ова не е само напад врз објект – ова е напад врз вредностите што нè држат заедно како заедница“, се наведува во реакцијата.
Од Заедницата потсетуваат дека Евреите во Македонија, иако малубројни, имаат длабоки историски корени и со децении придонесуваат за градење на мир и солидарност.
„Живееме со свои верски традиции, но секогаш сме биле дел од заедничкото секојдневие – рамо до рамо со сите граѓани“, се наведува во соопштението.
Воедно, тие изразуваат сериозна загриженост поради зголемениот говор на омраза и нетолеранција во последниот период. Посебно се предупредува на тенденцијата македонските Евреи да се поистоветуваат со актуелните геополитички случувања на Блискиот Исток – појава која, според нив, е неправедна и опасна, и отвора простор за антисемитизам.
Обидот за подметнување пожар е оценет како алармантен сигнал, поради што од Заедницата бараат итна и ефикасна реакција од надлежните институции.
„Апелираме за целосно расветлување на случајот и доследна примена на законите. Но уште поважно – апелираме до совеста на општеството да не дозволи омразата, стравот и незнаењето да станат погласни од разумот, човечноста и правдата“, се вели во нивната реакција.
Еврејската заедница повика и на обединета и недвосмислена осуда од страна на верските лидери, институциите и граѓаните, нагласувајќи дека само преку заедничка реакција може да се спречат вакви инциденти во иднина.
