Основното јавно обвинителство Куманово отвори постапка поради националистички скандирања што вчера се слушале од трибините за време на кошаркарскиот натпревар Македонија – Романија, одигран во спортската сала во Куманово. Настанот го засенчија навредливите повици кои, според Обвинителството, содржеле елементи на говор на омраза.
Од ОЈО Куманово информираат дека до СВР Куманово издале повеќе наредби и насоки, меѓу кои и обезбедување снимки од видео надзор со цел идентификација на сторителите.
„Се испитуваат сите околности околу скандирањата и се утврдува дали има елементи на кривично дело,“ соопштија од Обвинителството.
Инцидентот се случил во присуство на владина делегација предводена од премиерот Христијан Мицкоски, кој го следел натпреварот заедно со кумановскиот градоначалник и лидер на ЗНАМ, Максим Димитриевски. На трибините биле и министерот за јавна администрација Горан Минчев, министерот за внатрешни работи Панче Тошковски, вицепремиерот Иван Стоиљковиќ и други високи државни претставници.
Натпреварот се одржа на Илинден и воедно ја означи повторната свечена употреба на спортската сала во Куманово по реконструкцијата.
