Метео анализа на Славчо Попоски:
Под влијание на нов длабок циклонски систем со центар над Џеновскиот залив и негово проширување кон Јонското море со својата долина ќе пристигне и во Македонија и ќе ни донесе нова голема промена на времето. 17 Февруари 2026 вторник ни носи нови обилни врнежи кои поради наглото заладување и продорот на ладен воздух од север проследен со засилен до силен ветер од северен правец (над 70 км/час)ќе преминуваат во врнежи од снег најпрвин на повисоките населени места а попладнето и вечерта врнежи од снег ќе има и во пониските предели особено во западните и во северните предели од Македонија.
На планините и на скијачките центри снежната покривка значително ќе се зголеми и за повеќе од 20 сантиметри и ќе се прошири а мала снежна покривка е можно да се формира и во дел од градовите во западните и во северните предели од Македонија. За време на овој нов обилен бран на врнежи ќе наврне ново големо количество на воден талог особено во западните предели и тоа над 30 литри на метар квадратен воден талог за 24 часа.
Во Скопје и околината исто така ќе имаме пообилни врнежи од дожд а на околните планини ќе врне снег но поради заладувањето со силен северен ветер врнежи од снег ќе има и во околните повисоки предели од Скопскиот регион.
Да напоменам дека повторно поради очекуваните обилни врнежи расте опасноста од ново излевање на реките особено во западните и во северозападните предели од Македонија па така постои ризик од нови поплави. Токму поради ова апелирам возачите да бидат крајно внимателни и да не се движат покрај водотеците.
Што се однесува до температурата таа ќе се искачува во интервалот од 1 до 9 степени меѓутоа доцна попладне и навечер таа дополнително ќе опаѓа. Во Скопскиот регион температурата ќе се искачи до околу 6 степени.
