Неколку денови пред да биде објавено компромитирачкото видео на коешто се гледа како докторот од Клиниката за неврологија Игор Кузмановски меша бела прашкаста супстанција и зборува за квалитетот на „белото“, во полициска станица Карпош во Скопје, 54-годишна жена пријавила дека од септември тој ѝ упатувал заканувачки пораки по телефон, пишува порталот „Слободен печат“.
Од Министерството за внатрешни работи за „Слободен печат“ потврдиле дека пријавата е примена и најавиле поднесок.
„На 4 октомври 2025 година во 20 часот, во СВР Скопје 54-годишна жена пријавила дека од месец септември И.К. од Скопје ѝ упатувал заканувачки пораки по телефон. Со него е извршен службен разговор во полициска станица и по целосно документирање на случајот ќе биде поднесен соодветен поднесок“, велат од МВР за „Слободен печат“.
Доктор Игор Кузмановски веднаш беше разрешен од функцијата директор на Клиниката за неврологија.
Наредните денови беше обелоденето и дека немал важечка специјалистичка лиценца од Лекарската комора од 15 март годинава па сè до минатата недела кога побарал нејзино продолжување за што доби 500 евра казна.
