Силното невреме што вечерва ја зафати Македонија предизвика сериозни проблеми во воздушниот сообраќај. Неколку авиони на „Wizz Air“ не можат да слетаат на скопскиот аеродром и се принудени да кружат над различни региони на земјата, чекајќи поволни временски услови.
Според податоците во живо од Flightradar24, најмалку три авиони – од Базел (WZZ995), Ајндховен (WZZ29GL) и Солун (WZZ4784) – прават обиколки над Велешко, Охридско и Источна Македонија. Барометриските височини се движат меѓу 17.000 и 30.000 стапки, а проценетите времиња на пристигнување веќе се пробиени.
Скопје моментално е под влијание на нестабилна облачна маса проследена со пороен дожд, град, силни електрични празнења и засилен ветер – услови кои значително ја нарушуваат безбедноста на авиосообраќајот. Слична временска состојба е регистрирана и во централниот и источниот дел на државата, што дополнително го отежнува слетувањето на авионите.
