Вчера попладне, во 15.10 часoт на регионалниот пат Нов Дојран – Валандово, на место викано „Фурска чешма“, пред крстосницата за село Дедели, полициски службеници од Полициската станица за граничен надзор и граничен премин Стар Дојран забележале патничко возило „форд мондео“ во кое се превезувале мигранти, извести МВР.
– Откако ги забележал полициските службеници, возачот се обидел да избега, но набргу со возилото излетал од патот и го напуштил местото, соопшти МВР.
Во несреќата, со тешки телесни повреди се здобило едно лице мигрант, додека со телесни се здобиле шест лица мигранти, сите од Сирија, од кои тројца малолетници, констатирани во Здравствен дом Гевгелија, додаваат од Министерството.
Увид на местото извршила екипа од ОВР Валандово и се преземаат мерки за расчистување на случајот.
