Јужнокорејските власти евакуираа повеќе од 10.000 луѓе и затворија училишта во областите погодени од поплавите предизвикани од тропската бура Канун.
Бурата Канун се движи кон главниот град на Јужна Кореја, Сеул, објави Ројтерс.
Може да го погоди и главниот град на Северна Кореја, Пјонгјанг, а тамошните државни медиуми објавија дека армијата и владејачката партија добиле наредба да подготват мерки за ублажување на поплавите.
Околу 350 летови и 410 сообраќања на возови се откажани во Јужна Кореја, а повеќе од 10.000 луѓе се евакуирани на безбедно, соопшти МВР.
Засега нема жртви. Невремето донесе и до 60 милиметри дожд на час во некои градови на источниот брег, а максималната брзина на ветерот беше 126 километри на час во југоисточното пристаниште Бусан, соопшти Метеоролошкиот институт.
Повеќето училишта се затворени поради летен одмор, но речиси половина од нив нудат летни часови, така што околу 1.600 такви училишта беа затворени или префрлени на учење од дома поради невремето, соопшти Министерството за образование.
Некои училишта во источната крајбрежна провинција Гангвон беа погодени од поплави и лизгање на земјиштето. Земјата сè уште се опоравува од интензивните монсунски дождови што ја погодија минатиот месец, при што загинаа повеќе од 40 луѓе, вклучително и 14 во поплавен тунел.
