Иранскиот 26-годишниот фудбалер Амир Наср-Азадани е еден од луѓето кои би можеле да бидат погубени на плоштадот Шахид Алихани во Исфахан, централен Иран. Тој беше обвинет за бунт против владата, што во Иран се казнува со смрт.
Споменатиот плоштад инаку е неугледен дел од Исфахан, но сега стана место каде приврзаниците доаѓаат да му дадат поддршка на фудбалерот.
Стравуваат дека Наср-Азадани може да биде убиен на плоштадот, каде што е поставена платформата за егзекуција, изјави за „Си-Ен-Ен“ извор близок до младиот фудбалер.
„Си-Ен-Ен“: Најмалку 43 лица во Иран би можеле да се соочат со егзекуција
Иранските семејства, чии членови се осудени на смрт поради нивната поврзаност со протестите ширум земјата, веруваат дека Западот во моментот е преокупиран со божикните прослави и дека во Иран ќе има бран на егзекуции. Поради протестите по смртта на 22-годишниот Махса Амини, многу луѓе се осудени на смрт, додека илјадници се во затвор.
Работејќи со активистичката група „1500Тасвир“, „Си-Ен-Ен“ прегледа документи, видео, сведоштва и изјави од земјата кои сугерираат дека најмалку 43 лица, вклучувајќи го и Наср-Азадани, би можеле да се соочат со неизбежна егзекуција.
Иранските власти веќе егзекутираа најмалку две лица во врска со протестите минатиот месец. Едно лице беше дури и јавно обесено. Изјавите на сведоците и официјалните документи прегледани од „Си-Ен-Ен“ и „1500Тасвир“ даваат доказ дека се одржале избрзани судења и дека обвиненијата кои би можеле да доведат до смртна казна честопати се поднесуваат за време на едно сослушување.
Обвинувања против фудбалери
Наср-Азадани е обвинет за вмешаност во убиството на тројца припадници на безбедносните сили, вклучително и двајца доброволци од милицијата Басиџ, за време на протестите во Исфахан на 16 ноември, објави иранскиот државен медиум ИРНА минатата недела.
Според ИРНА, главниот судија на градот Асадула Џафари рече дека Наср-Азадани е обвинет за бунт против владата. Според иранскиот кривичен законик, казната за ова вклучува и смртна казна. Извор близок до фудбалерот вели дека приврзаниците се надевале дека фудбалерот ќе биде ослободен, но дека доаѓаат на плоштадот да видат дали е погубен.
„Од денот кога беше уапсен, властите рекоа дека ќе биде ослободен до крајот на неделата“, изјави извор за Си-Ен-Ен. После тоа немаше никакви информации, а неколку недели подоцна властите им соопштија дека фудбалерот може да биде обесен на плоштадот Шахид Алихани.
Семејството на Наср-Азадани првично не ја знаеше причината за неговото апсење, а официјалните лица не сакаа да споделуваат информации за неговата состојба, изјави извор за Си-Ен-Ен. Надлежните му порачале на семејството на фудбалерот да молчи за случајот доколку сакаат тој да биде ослободен.
Судот минатата недела објави дека добил видео и доволна документација со која се докажува дека Наср-Азадани е дел од вооружена група. ИРНА објави дека фудбалерот ја признал вината.
