Тренерот на Рома, Жозе Мурињо најверојатно ќе биде новиот селектор на Бразил, изјави поранешниот бразилски фудбалски репрезентативец Карлос Алберто, пренесува специјализираниот фудбалски портал „Goal.com“.
Бразил моментално е без селектор, бидејќи Тите поднесе оставка по елиминацијата од Хрватска во четвртфиналето на Светското првенство, кое заврши на 18. декември во Катар.
Еден од кандидатите за нов тренер на „кариоките“ е Мурињо, кој одби да ја преземе португалската репрезентација, бидејќи има договор со Рома до јуни 2024 година.
„Ова директно ќе го кажам. Мурињо најверојатно ќе биде новиот селектор на Бразил. Официјално ја објавувам оваа вест. Мурињо ме замоли да му бидам помошник во стручниот штаб”, изјави Алберто во подкастот за “Mundo GV”.
Алберто (38) одиграл пет натпревари за Бразил, а во 2004 година со Порто предводен од Мурињо ја освои Лигата на шампионите.
